Irma Joubert

Irma Joubert Nuut(2) Mei 2013

Irma Joubert is gebore en getoë in die Bosveld (Nyl­stroom) en het aan die Universiteit van Pretoria gestu­deer. Sy het vir 35 jaar onderwys gegee (Afrikaans en Geskiedenis vir senior sekondêre leerders) voordat sy einde 2004 afgetree en begin skryf het. Sy het sedert­dien as vryskut-joernalis verskeie artikels en kortver­hale in tydskrifte gepubliseer, is in 2005 aangewys as Media24 se Spesialisjoernalis van die Jaar en was ’n Mondi-finalis.

Tans skryf sy historiese romans, want geskiedenis is haar passie. Haar bekendste boeke is Verbode drif, Ver wink die Suiderkruis, Tussen stasies en die trilogie Anderkant Pontenilo, Pérsomi en Kronkelpad wat by NB Uitgewers verskyn het.

In 2008 was Irma ’n finalis vir die ATKV-Woord­veertjieprys vir Prosa met Tussen stasies, en in 2010 wen Anderkant Pontenilo die ATKV-Woordveertjieprys vir Liefdesromans. Sy was ook finalis vir die ATKV-Woordveertjieprys vir Liefdesromans met Pérsomi in 2011 en Kronkelpad in 2012.

Sy is al 43 jaar lank getroud met Jan en woon in Bloemfontein. Hulle het drie volwasse seuns, ’n skoon­dogter, ’n pleegdogter en drie kleinkinders.

Ver wink die Suiderkruis en Tussen stasies is reeds in Nederlands vertaal. Volgens die Nederlandse uitgewer was Irma Joubert ononderbroke op die toptien-treffer­lys vir meer as twee jaar.

Immer wes (Voorblad)

Irma Joubert se finale boek in die Tussen Stasies -Trilogie

Boek 2 in die trilogie

My stories kom uit die lewe self. Stories is deel van die lewe, dis deel van elke dag. Elke tiener wat verlief raak, elke kind wat gebore word, elke huwelik wat in ’n hofsaak eindig, is mos ’n storie. Elke oumens, elke kerkraad, elke dorp het sy eie stories.
Ek luister na stories, mense wat vir my ware stories vertel. So al my boeke is gegrond op ware stories. “Verbode drif” en “Tussen stasies” is byvoorbeeld gegrond op mense wat werklik die gebeure deurleef het, terwyl “Ver wink die Suiderkruis” en “Anderkant Pontenilo” kombinasies van ’n paar ware stories is.
Vir ’n historiese roman doen ek baie navorsing voordat ek begin skryf, want as oud-Geskiedenis onderwyser is korrekte historiese feite vir my essensieel. My navorsing gee dan vir my ’n raamwerk van feite, dan vleg ek die fiksie tussenin sodat feit en fiksie totaal verweef word tot ’n eenheid. Die feite in die boek maak dat mense onwillekeurig die fiksie glo. En hoe meer ek nalees en oplees en plekke besoek, hoe meer word die storie realiteit, hoe meer diepte kry my storie.
Voordat ek ’n storie begin skryf, leer ek eers my karakters baie goed ken, ek leef maande lank met hulle saam. Tydens my navorsing sien sy hulle in die situasies waarvan ek lees, ek hoor hulle praat wanneer ek onderhoude voer met mense wat in soortgelyke situasies was, ek sien my karakters in die plekke wat ek besoek. Sodat, teen die tyd dat ek begin skryf, dit nie meer ’n storie is nie, maar ’n stukkie waarheid oor mense wat ek as verteller baie goed ken.
En juis daarom is dit glad nie lekker as ’n boek klaar is nie. Want dan is die mense in die boek nie meer elke dag by my nie. Die nuwe mense van die nuwe boek trek dan by my in, en dit neem lank om hulle eers te leer ken en lief te word vir hulle, voordat ek weer hulle storie kan vertel.
Want vir my is skryf nie maar net skryf nie – skryf is so deel van my soos asemhaal, dis in my bloed, dit gaan deur my hart kop toe. En daarom sal daar seker (hopelik) altyd weer ’n storie wees wat wag om vertel te word.

Toe ek begin boeke skryf het, het ek by myself gedink: wie op aarde sal nou in ’n boekwinkel inloop en ’n boek koop van ’n totaal onbekende skrywer? Daarom besluit ek om vir ’n boekklub te begin skryf, kry by “Romanza” van LAPA hulle riglyne en val weg.
Vonkpos vir die hart was die heel eerste boek wat ek geskryf het – ’n mens weet mos nie vooraf of jy ’n regte bóék kan skryf nie. Vonkpos is geplaas in Natal, waar ons vir meer as dertig jaar gewoon het, met onder andere die Drakensberge, een van my gunstelingplekke in Suid-Afrika.
Vier maande later is my tweede boek, ’n Beskermengel vir Marlene, ook as deel van die Romanza-reeks gepubliseer. Albei hierdie verhale het eintlik as kortverhale begin, toe word hulle te lank en toe word hulle maar boeke. LAPA het pas die twee boeke weer uitgegee as ’n duet onder die titel Veilige hawe.
Vonkpos vir die hart en ’n Beskermengel vir Marlene is nie historiese romans soos my latere werke nie. Dit speel af in die wêreld waarin ons nou lewe, dit raak aan probleme wat ons elke dag ervaar. Maar die oorkoepelende mag bly die liefde, dis sommer net twee stories om ’n mens se tone te laat krul van lekkerte.

Nouja, toe besluit ek: ek kan nou ’n boek skryf, so ek wil aanbeweeg na my eintlike passie, naamlik historiese romans. Ek het ’n passie vir geskiedenis. Nie die “Drum and trumpet history” van oorloë nie, meer wat bekend staan as “people’s history” of dan sosiale geskiedenis, hoe mense in verskillende tye geleef het.
My passie lê spesifiek in die eerste helfte van die 20e eeu, vanaf 1900 tot so die 1950’s. Dit begin met die Anglo Boere-oorlog, die Eerste Wêreldoorlog en die gepaardgaande Rebellie van 1914, dis ook die tyd van die Depressie in die 1930’s, die Tweede Wêreldoorlog 1939 – 1945, van die oorname van Afrikaner-nasionalisme in 1948 en die swart Uhuru in Afrika vanaf die middel 1950’s.
En dis net hier waar my stories begin. My ouma het my kleintyd vertel van die Boereoorlog, van my oupa wat as tienjarige seuntjie in die Standertonse konsentrasiekamp was. Die Rebellie het vir my ’n werklikheid geword toe “Bart Nel” op hoërskool ons voorgeskrewe boek was. Die 1930’s is die tyd toe my ouers verlief geraak het, die 1940’s die tyd toe ek gebore is, die 50’s toe ek sorglose grootwordjare op ’n Bosveldplaas geniet het. Miskien is dit waarom ek skoon nostalgies kan raak oor alles in daardie tyd.

19 thoughts on “Irma Joubert

  1. Maritsa says:

    Goeie dag is daar n moontlikheid dat ek die boek voorlesing wat deur rsg gelees is van tussen stasies kan bekom.

  2. Anna marie says:

    Hi kan iemand die volgorde van die boeke vir my gee. Ek al jou boeke maar wil hul merk die volgorde.

  3. Elsbeth says:

    Ek lees gewoonlik nie Afrikaanse boeke nie, maar ek het die afgelope 10 dae 4 van jou boeke verslind en wil dit weer lees. En het sommer die res bestel. Dit laat jou lag en huil. Maar die huil is anders want dit laat jou selfs huil as dit nie oor huil gaan nie. Dis ongelooflik mooi en dit laat my ook na my ouers verlang veral my pa wat deel van ‘n familie van ‘n dorpie in die Vrystaat (Lindley) was wat ook in die Bosveld ‘n plaas gehad het (Samaria)

    • cliffordenen says:

      Elsbeth, welkom terug in Afrikaans. Ons hoop jy bly hier, want daar is baie goeie Afrikaanse skrywers en niks is so lekker soos om in jou eie taal te lees nie. Groete

  4. Toekie Rossouw says:

    IRMA WATTER WONDERLIK BOEKE DIT VOEL SO NA AAN MY EIE SIEL…. MY MA WAS EEN VAN DIE DUITSE WEESIE WAT IN 1948 NA SUID-AFRIKA GEBRING IS…. AG STUSSEN STASIE… DIT HET GEVOEL OF EK SELF IN DIE WONDERLIK BOEK GELEEF HET…. WANT VERSEKER KEN EK DIE HARTSEER EN LEED WAARDEUR MY MA EN HAAR SUSTER MOES GAAN ..NA AL JOU BOEKE WAT EK GELEES HET KAN EK NIE ANDERS AS OM DIE GEVOEL IN MY TE KRY … WENS SO EK KAN MET JOU GESELS EN AL MY ERVRINGE MET JOU TE DEEL VAN MY MA EN ALS WAT HULLE MOES DEUR GAAN.. WIE SAL DIT BETER VERSTAAN AS JUIS JY WAT AL DIE BOEKE GESKRYF HET……!!!!!!!!!!!!

  5. Serfrehano Rossouw says:

    Goeie dag

    ek is ‘n 21jarige Seun wat baie deur moes maak om te kom waar ek vandag is, ek wil graag ‘n boek skryf om mense te vertel van die hel waardeur ek is.

  6. MILDA says:

    Liewe Irma
    Ek is mal oor lees en jou boeke is die beste. Was skoon uit my vel toe ek hoor jy is die VLU se skrywer van die jaar. Ek is ons tak se skakelbeampte en sou graag ‘n persoonlike boodskap en miskien ‘n foto van jou baie waardeer. Dit is nou natuurlik vir ons takalbum vir die jaar. Is daar enige manier waarop ek jou kan kontak?

    Groete
    Milda

  7. Aliche Botes says:

    Hallo Tannie
    Ek is Aliche. Ek is ‘n graad 9 leerder van Sand du Plessis Hoërskool. Ek het ingeskryf vir die BSV skryfkompitisie en was ek nie bly toe ek sien dat een van my gunsteling skrywers die pryse gaan oorhandig nie! Ek sien baie uit om te hoor of ek miskien een van die gekukkige wenners gaan wees. Ek is mal oor lees en Tannie skryf baie goed. Ek wil ook graag eendag so goed kan skryf. Tog sukkel ek om stories langer as 10 blaaie te skryf. Ek raak dan vinnig verveeld. Het Tannie enige wenke vir ‘n jong skrywer? My ouma is ook een van tannie se groot aan hangers ( MIemie York). Ons is altyd baie opgewonde as ons sien daar is weer ‘n nuwe boek van Irma Joubert op die rakke sien.
    Ek hoop om van tannie te hoor
    Groete
    Aliche

  8. Marietjie Nelson says:

    Ek kry net nie genoeg van jou boeke nie Irma! Ek word deel van die karakters in elke boek en as ek eers begin lees kan ek die boek net nie neersit nie! Ek gaan beslis die boeke koop wat ek nog nie het nie. Ver wink die suiderkruis, Tussen stasie, Pontenilo en Persomie het so diep onder my vel gekruip! Ek kan nie wag vir nog nie!! Baie dankie vir ure se leesplesier!!

  9. Mari Roberts says:

    Wel Irma, jy het reggekry wat geen ander Afrikaanse skrywer tot dusver kon doen nie. My oudste (13jr) is ‘n fanatiese engelse lesers. Mos meer opwindend. Nou is dit vakansie en die boeke opgelees wat ons het. Ek gee vir haar Tussen Stasies met die woorde: “Probeer dit net en sê wat jy dink.” Wel, sy slaap amper niks nie, want sy lees net. Ek sal deur diep dale gaan om die ander boeke vir haar te kry, solank sy net Afrikaans lees. Baie dankie vir ‘n heerlike lees ervaring.

  10. Hannelie says:

    Ek het die boek Persomi gelees en baie geniet! Waar kom die naam vandaan? Die ma het genoem dat die pa van Persomi die naam in ‘n toneelstuk gehoor het. Is daar so ‘n stuk, of is dit fiksie? Dankie vir ure se heerlike lees.

  11. Miemie York says:

    Ek het al drie jou boeke, Tussen Stasies, Anderkant Pontenilo en so pas Persomie, gelees en het elkeen afsonderlik so geniet! Ek het nog nooit werklik historiese verhale gelees nie, maar jy is beslis ‘n inspirasie en ek kan nie nalaat om vir al my vriendinne te vertel hoe baie ek jou boeke geniet het nie. Selfs jou Romanza ”n Beskermengel vir Marlene’ het ek net so geniet en is een van my staatmakers op my boekrak. My man dink ek lei aan Alzheimer want hy sien dat ek oor en oor dieselfde boeke lees! Baie dankie vir die wonderlike inspirasie en die ure se leesgenot wat jy vir ons boekwurms gee.
    Hoop ons kry sommer weer een van die dae nog so ‘n voortreflike reeks boeke om te lees!
    Groete
    Miemie

  12. Mari Roberts says:

    Baie geluk Irma met jou Veertjie. Ek het nog nie Pontenilo gelees nie, want kon dit nog nie kry nie. Ons winkels is effens agter die klip wat seker genre’s betref. Tussen Stasies en veral Verbode drif was my allergunsteling. Daar is nou ‘n boek wat die emosies in ‘n mens losmaak en lank daarna nog laat ervaar!

  13. Gretha du Plessis says:

    Irma,

    Ek is nie ‘n afrikaanse boek leser nie maar wat ‘n wonderlike goudmyn het ek in jou boeke ontdek. “Verbode drif” het ek saterdag oggend gekoop en sondag middag klaar gelees!!! Wat ‘n wonderlike boek. Gelag, gehuil, gehartseer, ge-alles!!! Is veral mal oor die bosveld tema omdat ek self hier bly. As ek mag vra, watter omgewing in die bosveld het jy gebruik of in gedagte gehad toe jy “Verbode drif”geskryf het? Ek her dadelik maandag gegaan en al jou ander boeke gaan koop!! Kan ongelukkig nie “Tussen stasies” kry op ons ou dorpie nie maar waar daar ‘n wil is, is daar ‘n weg!!! Die arme man wat by ons boekwinkel werk, wil al weg hardloop as hy hierdie vrou aangestap sien kom, om uit te vind of haar boek al hier is wat sy bestel het!!!

    Sien ook uit na nog!!!!

    Groete

    Gretha

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s