Agter maskers – Marijke Greeff

agterWilmien trek haar asem in om iets te sê maar sy bly skielik stil en fluit toe saggies deur haar tande. “Wow! Kyk net wat het ons nou hier agter die toonbank.” Sy woel haar vingers deur haar hare. “Hy lyk mos na iets wat op die spyskaart hoort.”

“Sê die een wat wil trou en kinders hê,” sê Mia droog terwyl sy die spyskaart nader trek. Sy kyk nie eens na die persoon waarna Wilmien verwys nie.

“Wel, Mia, ek sal nie omgee as hy die pa van my kinders kan wees nie.”

Mia rol haar oë sonder kommentaar terwyl sy die erotiese name van die skemerkelkies op die spyskaart lees.

“Dames. Wat kan ek julle aanbied?”

Mia kyk op toe sy die diep stem voor haar hoor en haar asem verstok in haar keel toe sy in ’n paar donker oë vaskyk. Hy pen haar blik moeiteloos vas en dit voel vir Mia asof sy swart oë die masker wat sy met soveel moeite in posisie probeer hou sonder genade van haar afstroop sodat sy naak en weerloos en met elke seer ontbloot voor hom staan. Hy kyk na haar asof sy die enigste vrou in die vertrek is en sy voel skielik ver van die werklikheid verwyder. Dit voel of donker water oor haar kop toevou en sy doen nie eens moeite om te spartel nie.

“Mia het baie van die Sex on the Beach gehou.”

Lara se stem ruk Mia terug uit haar beswyming maar sy kry om die dood nie haar oë van die man voor haar weggeskeur nie. ’n Swart T-hemp span oor sy breë skouers en verbleikte jean word laag op sy heupe deur ’n swart leergordel afgerond. Sy donker hare is kort en deurspek met silwer. Sy skat hom in sy vroeë, dalk middel veertigs.

“Dit was baie lekker maar eintlik . . .” Haar stem kom skor tussen haar droë lippe deur, “eintlik is ek lus vir iets ryk en soet en dekadent en verbode.” Mia is verstom oor die woorde wat by haar mond uitkom en sy voel ’n hittevlaag in haar wange opstoot. Waar op aarde kom sy daaraan om so iets vir hom te sê?

Die donker vreemdeling agter die toonbank glimlag vlugtig. “Dit klink asof jy ’n Screaming Orgasm nodig het, Mia.”

’n Laggie borrel uit Mia se keel en glip oor haar lippe. As hy maar net weet! “Dit is presies wat ek nodig het.”

Hy laat haar blik eindelik vry maar Mia trek haar asem skerp in toe sy oë soos ’n liefkosing op haar lippe huiwer. “One Screaming Orgasm coming up.”

Mia onderdruk die kreun wat oor haar lippe wil glip net betyds. “Ek kan nie wag nie.”

Wilmien draai verstom na Lara. “Hy het ons nie eens gevra wat ons wil drink nie.” Sy maak nog ’n knoop van haar bloes los voordat sy haar hare deurmekaar vryf en agter haar ore indruk. “Die man wat my kan ignoreer, moet nog gebore word. Back off, ladies, hierdie dish agter die toonbank is myne.”

Lara lag. “Hou op kwyl, Wilmien, die ou het duidelik net oë vir Mia.” Sy lig haar hand om iemand anders agter die toonbank se aandag te trek.

“Mia is getroud.” Wilmien frons suur.

Lara rol haar oë veelseggend. “Ja, right. En jy is die toonbeeld van reinheid, Wilde Willemien. Ek laat my nie vertel dat jy nog nooit by ’n getroude man geslaap het nie.”

Mia hoor hoe Lara en Wilmien ook ’n bestelling plaas terwyl sy die vreemdeling ongemerk dophou. Hy is duidelik tuis agter die kroeg se toonbank. Hy hanteer die glase en bottels met ’n gemak en ervaring wat haar aan Tom Cruise in die fliek Cocktail laat dink.

’n Kelner leun oor die toonbank en glimlag verskonend vir die gaste. “Giep! Suzelle soek jou in die kombuis.”

“Ek is nou daar.”

Sy diep, rustige stem jaag opnuut ’n rilling langs Mia se ruggraat af en sy is doof vir die gekwetter van die mense om haar. Toe hy omdraai en ’n glas op ’n fyn steeltjie voor haar neersit, val sy weer magteloos in sy blik vas. ’n Strooitjie is parmantig na die een kant toe geknak.

“Proe en sê my wat jy dink.” Hy sit sy hande weerskante van hom op die toonbank en sy donker wenkbrou lig afwagtend.

Mia se hande bewe toe sy die drankie met die sjokoladeskaafsels bo-op optel en versigtig ’n slukkie neem, intens bewus van Giep se donker blik op haar. Sy sluit haar oë terwyl die koel lekkerte in haar keel afgly. “H’mmm, dis ryk en romerig, amper . . . soos ’n vloeibare poeding.” Sy kyk weer na hom en die lig in Giep se oë bring ’n beroering diep in haar binneste.

Onthou Romanza-klublede kry 50% afslag op alle SuperRomanzas!

Advertisements

One thought on “Agter maskers – Marijke Greeff

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s