Ná die winter – Salomé Schutte

Na die winter

Milan kyk ‘n laaste keer vir haarself in die spiëel. Haar gesig lyk vanaand anders. Haar oë blink en daar is ‘n blos op haar wange. Op die ingewing van die oomblik trek sy die rekkie wat haar hare in ‘n poniestert gehou het, uit. Sy vat die haarborsel en borsel haar hare totdat dit blink oor haar skouers lê. Wanneer laas het sy dit so gedra? Sy kan nie eers onthou nie. Lank terug, toe sy nog in ‘n ander lewe was, of so voel dit vir haar. Hier op die plaas ken almal haar met ‘n poniestert of ‘n vlegsel.

Toe sy die woonsteldeur agter haar toetrek, voel sy die vlinders in haar maag beweeg. Natuurlik het dit alles met Niklaas te doen. Dis nie die eerste keer wat hy hier gaan wees met aandete nie, maar vanaand voel vir haar anders. Vanaand durf sy om te hoop, hoe dom dit ookal mag wees.

Oom Lewies, tannie Sanet en Niklaas sit reeds by die groot tafel in die hoek van die eetkamer toe sy daar aankom. Die mans staan op toe hulle haar sien.

Milan kan dit nie help nie. Toe sy in Niklaas se oë kyk, slaan ‘n blos oor haar wange uit. Hopelik sien die ander nie. Gelukkig is die vertrek se beligting baie sag.

Tydens die ete gesels die oumense land en sand, maar nie Niklaas of Milan sê veel nie. Vir haar voel dit asof hulle hul oë nie van mekaar kan afhou nie en weer hoop sy oom Lewies en sy vrou sien nie die elektrisiteit tussen haar en hul seun raak nie. Dis onmoontlik om te voorspel waarheen alles gaan lei en net so onmoontlik om te raai hoe hulle sal voel as daar ooit iets tussen haar en Niklaas ontwikkel. Sal hulle ongelukkig wees om Anke as ‘n moontlike skoondogter te verloor?

‘n Suggie bars oor Milan se lippe. As sy net geweet het wat die ware toedrag van sake tussen Anke en Niklaas was. Hoekom sê hy haar nie reguit nie? Het hy ‘n goeie rede om haar op dié manier in die duister te hou? Wil hy homself net met Milan amuseer terwyl hy vir Anke wag? Die blote gedagte laat Milan siek voel. Nee, dit kan nie wees nie. Niklaas is ‘n man met integriteit. Hy sal nie so-iets doen nie.

Maar wat is regtig tussen haar en Niklaas aan die gang? Is hy besig om verlief te raak op haar? Het hy dalk besluit sy is die meisie vir hom, en nie Anke nie? Nou voel Milan eers siek. Die laaste ding op aarde wat sy wil wees, is ‘die ander vrou’. Sy weet hoe dit voel om opsy gestoot te word vir ‘n ander meisie. Dit is iets wat sy niemand anders toewens nie. Sy wil nie ‘n tweede Ronel wees nie. Genade, hoekom het sy nie verder gedink nie? Wat het haar besiel? Waarmee is sy besig?

“Milan …?”

Sy kyk op in Niklaas se bekommerde oë. “Wat is fout? Jy is skielik doodsbleek. Voel jy sleg?”

“Nee … ek … ek het net ‘n bietjie hoofpyn.”

“Ek hoop nie jy is besig om siek te word nie.” Tannie Sanet bekyk Milan ook bekommerd.

Oom Lewies skud sy kop. “Jy moet in die bed kom. Niklaas, stap saam met haar woonstel toe. Daar is hoeka ‘n griepvirus in die lug en Milan kan nie kanse vat nie.”

Voor sy kan protesteer, is sy en Niklaas buite, haar arm stewig in sy hand. “Milan, is jy orraait? Dit het gelyk of jy die aand baie geniet en skielik sien ek net jy lyk nie lekker nie. Is jy seker dis net ‘n hoofpyn?”

“Ja, daar is niks fout met my nie. Regtig.”

“H’m.” Hy maak die woonsteldeur vir haar oop. “Ek gaan sommer ook ry. Ek hoop jy voel môre beter. Ek sal vroeg ‘n draai kom maak om te kyk hoe dit gaan.”

Niklaas trek haar in sy arms in en hou haar styf vas. Milan kan haarself nie help nie, sy verlustig haar in sy wonderlike nabyheid. Skielik vervaag al haar vrese en skuldgevoelens. Solank as wat sy so in sy arms is, kan die res van die wêreld vergaan.

Maar te gou los hy haar weer en die realiteit van die situasie skop tot ‘n mate by haar in. Sy het geen reg om in sy arms te wees nie. Tog is dit met groot onwilligheid wat sy toekyk hoe hy die deur agter hom toetrek. Vanmiddag was so spesiaal en wie weet wat die dag van môre vir hulle gaan bring?

 

One thought on “Ná die winter – Salomé Schutte

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s