Jongste Romanzas en romans is hier!

Doring in haar vlees – Dina Botha

   Romanza Voorblad-Doring in haar vlees

Annika Eksteen en Connor Volschenk ding mee om dieselfde huurkontrak. Die eienaar van die perseel kan nie besluit aan wie hy dit moet toeken nie en nooi albei om die Paasnaweek by sy seehuis deur te bring …

Altyd die strooimeisie – Madelie Human

altyd die strooimeisie_high res

Meyer Malan steel Zoë se hart met die eerste oogopslag, maar hoe kan sy hom liefhê as hy juis een van die bevoorregtes is wat op haar pa se erfplaas grootgeword het. Kan sy die familie vertel wie sy werklik is?

Bloubaardman – Alda Geers

Romanza Voorblad-Bloubaardman

Omstandighede dwing Monica om onder Herman Lategan se beskerming te staan. Sy keer egter verbete dat die Lategans haar klein Ruben as erfgenaam vir hul familiedinastie inpalm. Maar kan sy langer haar gevoelens vir Herman keer?

Miljarde sterre – Elise Keyter

Romanza Voorblad-Miljarde sterre

Marlie en Ian is getroud ná ’n warrelwindromanse. Nou is die wittebroodstadium verby en hulle moet besluit: Verower weer mekaar se harte of laat toe dat dokter Sybil Beek slaag om hul huwelik te laat ontspoor.

MONSTERSAAD – Madelein Rust

Monstersaad Voorblad

Renata Malan is ’n forensiese sielkundige, die miljoenêrerfgenaam van haar aangenome pa, Leon Malan, ’n eiendomsmagnaat en doktor in die sielkunde.

Renata se familiegeskiedenis is tragies. Haar biologiese pa is ’n veroordeelde reeksmoordenaar wat van die gereg ontsnap het; haar ma en grootouers is onder tragiese omstandighede oorlede. Renata bring meeste van haar kinderjare in ’n weeshuis deur totdat Leon Malan haar as tiener aanneem.

Renata is ’n vennoot in Malan en Coetsee Privaatondersoeke. Hulle word genader om die dood van ’n sewentienjarige meisie, Melissa Verhoef, te ondersoek. Terwyl Renata besig is met die saak, worstel sy met haar eie demone – sy ly aan posttraumatiesestressindroom as gevolg van haar verlede. Sy gaan sien ’n baie onkonvensionele psigiater en pynlike herinneringe uit haar kinderdae doem op. Terselfdertyd vind sy uit dat haar pa nog leef en sy begin delf in die verlede om uit te vind waarom hy in die sewentigerjare nege mense vermoor het. Is hy ’n sosiopaat, of is hy bloot ’n man wat die reg in eie hande geneem het om ander se lewe te red?

Die saak waaraan sy werk raak uiters gekompliseerd wanneer sy besef dat Melissa se moord ook waarskynlik verband hou met ’n reeks moorde wat tien jaar gelede begin het.

Sy veg teen ’n intense aangetrokkenheid tot een van die verdagtes en moet ’n paar aanslae op haar lewe trotseer.

Met die hulp van haar span ontdek sy wie die moordenaar is en slaag sy uiteindelik daarin om die spoke van die verlede ter ruste te lê.

WOESTYNROOS – Vita du Preez

Woestynroos Voorblad

Op die oog af het Kato Klinge alles: Sy is aantreklik, intelligent en baie suksesvol in haar beroep as ingenieur, maar selfs ’n suksesgedrewe perfeksionis het moederlike instinkte. Kato wil ’n baba hê, maar daar is nie ’n spesiale man in haar lewe nie.

Stef Steenkamp, met wie Kato ’n jarelange platoniese vriendskap het, kom met ’n plan vorendag. Daar is reeds ’n baie spesiale band tussen hulle, want Stef se ma is tydens sy geboorte oorlede en Bea Klinge het Stef saam met haar eie babadogter, Kato, aan haar bors geneem. Volgens Stef is dit die ideale oplossing dat hulle saam ’n baba sal hê en die verantwoordelikheid vir die baba se opvoeding deel. Hulle kind sal in ’n liefdevolle, standvastige omgewing grootword, want niks gaan ooit hulle vriendskapsverhouding vertroebel nie. Hulle kind sal ook nooit die trauma van ’n egskeiding beleef nie, want hulle gaan nooit die romantiese liefde en die trouding doen nie.

Stef kon Kato, wat alles volgens die boek doen, nog altyd ’n gat in die kop praat en haar oortuig om goed te doen waaraan sy nooit eens in haar stoutste drome sou dink nie.

Kato stem in.

Om hierdie baba te verwek, moet Kato egter net so hard werk soos vir enige iets anders wat sy al in die lewe bereik het.

Stef hou van vroue, maar hy verkies T20-romanses met girls wat nie ’n man se vlerke wil knip nie. Kan so ’n man ’n kind verwek en steeds net platoniese vriende bly met die ma van sy kind?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s